Грамадскае аб'яднанне "Беларускі саюз жанчын" (ГА "БСЖ") створана 14 снежня 1991 года. На добраахвотнай аснове аб'ядноўвае жанчын у структурных падраздзяленнях арганізацыі, створаных ва ўсіх абласцях, раёнах, гарадах, у многіх працоўных калектывах і па месцы жыхарства жанчын. Цяпер у саюзе больш за 150 тысяч жанчын, дзейнічае звыш 5 тысяч першасных арганізацый. Вышэйшым органам Беларускага саюза жанчын з'яўляецца канферэнцыя, якая збіраецца не радзей як 1 раз у 5 гадоў. У перыяд паміж канферэнцыямі пастаянна дзейным кіруючым органам з'яўляецца Праўленне ГА "БСЖ", выканаўчым - Прэзідыум ГА "БСЖ".

Мэты і задачы ГА «БСЖ»: павышэнне статусу жанчын у грамадстве, іх ролі ва ўсіх абласцях жыцця краіны; дасягненне грамадзянскай згоды ў грамадстве; арганізацыя асветніцкай і кансультацыйнай дзейнасці; садзейнічанне ахове і паляпшэнню здароўя жанчын, павышэнню якасці іх жыцця; ажыццяўленне дабрачыннай дзейнасці; абарона правоў жанчын і дзяцей, умацаванне сям'і; ажыццяўленне міжнароднай дзейнасці метадамі жаночай дыпламатыі.