Канферэнцыя прафсаюзнай арганізацыі студэнтаў інжынерна-педагагічнага факультэта, якая прайшла 5 сакавіка ў 20-м навучальным корпусе, стала кропкай, дзе падвялі вынікі паўгадавой працы і вызначылі далейшыя арыенціры. У яе працы прынялі ўдзел 22 дэлегаты: прадстаўнікі кожнай вучэбнай групы факультэта, а таксама запрошаныя госці - старшыня ППА студэнтаў БНТУ Максім Кулік і намеснік дэкана па ідэалагічнай і выхаваўчай рабоце Юлія Суша.
Парадак мерапрыемства ўключаў чатыры ключавыя пытанні: ацэнку работы прафсаюзнага бюро, выбары старшыні і яго намесніка, а таксама фарміраванне новага складу актыву. Справаздача дзейнага прафбюро была прызнаная эфектыўнай – паказчык таго, што праца вялася сістэмна і з рэальнымі вынікамі.
Па выніках галасавання старшынёй ПА студэнтаў ІПФ стаў Валерый Нядбальскі (група 10903124), яго намеснікам – Маргарыта Маклак (група 10903124). Абодва лідэры добра вядомыя сваёй актыўнай пазіцыяй і ўдзелам у жыцці факультэта.
Таксама быў сфарміраваны поўны склад прафсаюзнага актыву, які ўключае прадстаўнікоў усіх напрамкаў студэнцкай дзейнасці: скарбніка, сакратара, прафоргаў па сацыяльнай, культурна-масавай, спартыўнай і інфармацыйнай рабоце, а таксама прафоргаў кожнага курса.
Асаблівую ўвагу на канферэнцыі надалі падзякам. За плённую працу і значны ўклад у развіццё прафсаюзнай арганізацыі былі адзначаны прадстаўнікі папярэдняга складу: Анастасія Іванова – за пісьменную працу на пасадзе старшыні, і Павел Малевіч – за актыўную дзейнасць на пасадзе намесніка старшыні.
Канферэнцыя паказала, што прафсаюзная арганізацыя ІПФ застаецца важным цэнтрам ініцыятыў, які аб'ядноўвае студэнтаў і стварае прастору для дыялогу, падтрымкі і развіцця. Наперадзе новыя праекты, ідэі і задачы для студэнцкай супольнасці.
