У межах Адзінага дня інфармавання 16 і 17 верасня старшы выкладчык Кандрацёнак А.В., выкладчык-стажор Васека А.А і выкладчык-стажор Місінкевіч Е.А.. правялі для першакурснікаў куратарскія гадзіны, прысвечаныя важнай гістарычнай даце — 17 верасня 1939 года.
Асноўнай тэмай сустрэчы стаў «Дзень народнага адзінства як фактар нацыянальнага гонару». У ходзе гутаркі выкладчыкі пазнаёмілі студэнтаў з гісторыяй свята, распавялі пра ключавыя падзеі, якія сталі актам аднаўлення гістарычнай справядлівасці і ўз'яднання беларускага народа.
Асаблівая ўвага была ўдзелена гістарычным перадумовам свята. Студэнты даведаліся, што ў перыяд з 1921 года Заходняя Беларусь апынулася ва ўмовах палітыкі падаўлення нацыянальнай ідэнтычнасці: закрываліся беларускія школы, культурныя арганізацыі і бібліятэкі, забаранялася беларуская мова. Кульмінацыяй жудасных рэпрэсій стала стварэнне канцлагера ў Бярозе-Картузскай, праз які прайшлі да 10 тысяч чалавек… Пераломным момантам стаў верасень 1939 года. Як было адзначана на сустрэчы, 17 верасня Чырвоная армія перасекла польскую мяжу і за тыдзень вызваліла Заходнюю Беларусь!
Пасля тэарэтычнай часткі студэнты паглядзелі два дакументальныя фільмы: «Верасень, які змяніў Беларусь» і «Уз'яднанне беларускага народа». Кінастужкі дазволілі наглядна ўбачыць, як праходзіў працэс вызвалення, як сустракалі чырвонаармейцаў мясцовыя жыхары і якое значэнне гэта падзея мела для далейшага развіцця краіны.
Завяршылася сустрэча ажыўленым абмеркаваннем. Студэнты падзяліліся сваімі ўражаннямі ад прагледжанага, адзначыўшы важнасць захавання гістарычнай памяці і нацыянальнага адзінства для сучаснай Беларусі. Усе прыйшлі да высновы, што Дзень народнага адзінства — гэта не проста дата ў календары, а напамін пра тое, што сіла нацыі заключаецца ў згуртаванасці і гатоўнасці разам будаваць будучыню сваёй краіны!
Автор материала: Елизавета Наварко, гр. 10702325
Фото: Анастасия Васека
