20 красавіка 2023 года на кафедры “Беларуская і руская мовы” факультэта міжнароднага супрацоўніцтва адбылася ІІ Міжнародная студэнцкая навукова-практычная канферэнцыя “Мова – Грамадства –Культура”.
Разам з замежнымі студэнтамі БНТУ ў ёй узялі ўдзел студэнты ўніверсітэтаў Кітая, Туркменістана, Узбекістана і іншых краін. Афлайн і анлайн, вочна і завочна яны знаёмілі ўдзельнікаў канферэнцыі са сваімі здабыткамі ў галіне мовазнаўства, культуралогіі і гісторыі.
Даклады пленарнага пасяджэння былі навукаёмкімі і займальнымі, адкрывалі перад слухачамі часам культурныя пласты краін і цывілізацый, акуналі ў атмасферу нацыянальнай музыкі, літаратуры, гісторыі, архітэктуры і мастацтва.
Пасля пленарнага пасяджэння пачала працу секцыя 1, на якой прадстаўнікі Кітая і Рассіі асвятлілі пытанні гуманітарных навук: мовазнаўства і літаратуразнаўства.
Аспірант Акадэміі Навук Чжан Цімін выступіў з двума дакладамі, дзе падрабязна з вялікай колькасцю прыкладаў пазнаёміў слухачоў з моўнымі сродкамі выражэння пахвалы і пакарання ў “Педагагічнай паэме” А. Макаранкі, а таксама ў рускай класічнай літаратуры ХІХ стагоддзя ў аспекце фарміравання асобы дзіцяці.
Найбольшую цікавасць выклікаў даклад магістранткі Хуан Ніннінг аб значэнні якасці мовы настаўніка ў працэсе выкладання музыкі, а таксама даклад Лю Ханюй, у прэзентацыі якога было мноства захапляючых і прыгожых выяў на тэму паходжання і эвалюцыі кітайскіх іерогліфаў.
У рабоце секцыі “Актуальныя пытанні культуразнаўства” ўзялі ўдзел 15 студэнтаў з Лівана, Беларусі, Таджыкістана, Італіі, Кітая, Узбекістана, Калумбіі.
У межах канферэнцыі працавала анлайн-секцыя “Асаблівасці кітайскай мовы і культуры”. У праграме секцыі былі заяўлены 10 удзельнікаў – прадстаўнікоў трох кітайскіх ВНУ: Шэньянскага тэхналагічнага інстытута, Хэфейскага тэхналагічнага ўніверсітэта і Гуандунскага фінансава-эканамічнага ўніверсітэта.
Тэматыка прадстаўленых дакладаў шырокая: культурныя сімвалы і традыцыі Кітая, асаблівасці кітайскай мовы, родны ўніверсітэт, сучасныя тэхналогіі і іх уплыў на эканоміку краіны. Усе даклады атрымаліся змястоўнымі і цікавымі.
Хацелася б адзначыць даклад студэнтаў Шэньянскага тэхналагічнага інстытута Чжао Лінбо і Цзі Жуіін на тэму “Чэн’юй – патаемны фонд кітайскай культуры”, у якім яны расказалі аб значэнні і паходжанні многіх устойлівых выразаў кітайскай мовы. Даклад студэнтаў суправаджаўся маляўнічай музыкальнай прэзентацыяй, а самі Чжан Лінбо і Цзі Жуіін былі апрануты ў традыцыйны кітайскі касцюм. Студэнты таксама прадэманстравалі не толькі валоданне кітайскімі фразеалагізмамі, але і фразеалагізмамі рускай мовы.
У секцыі “Актуальныя праблемы лінгвадыдактыкі ў эпоху інфармацыйных тэхналогій” выступоўцы гаварылі на рускай, англійскай і туркменскай мовах аб значэнні ІТ у сферы адукацыі, аб неабходнасці вывучэння замежных моў, аб спосабах і метадах асваення навейшых навыкаў навучання, аб ролі і статусе педагога ў сучаснай вучэбнай аўдыторыі, аб настроях і чаканнях сучаснага студэнта. Аўтары гэтых дакладаў – студэнты Туркменскага дзяржаўнага архітэктурна-будаўнічага інстытута.
У канферэнцыі ўзялі ўдзел і беларускія студэнты такіх факультэтаў як АТФ, БФ, ЭФ, ФТКГ. У секцыі “Актуальныя пытанні беларускай мовы і культуры” ўдзельнікі абмяркоўвалі такія пытанні, як тапаніміка малой радзімы, лексічныя асаблівасці розных стылей сучаснай беларускай мовы, тэматыка, праблематыка, моўныя сродкі выразнасці твораў беларускіх аўтараў.
У секцыі 6 прагучалі даклады па такіх дысцыплінах, як фізіка, хімія, біялогія, інфарматыка.
Ажыўленую дыскусію выклікаў даклад слухача падрыхтоўчага аддзялення ФМС з Ірана Бехнама Эбадзі “Тэхналогіі трохмернай выявы пры вывучэнні раздзела “Анатомія” ў біялогіі” (навуковы кіраўнік – выкладчык Каўцэвіч Ірына Анатольеўна). Мець магчымасць вывучаць падрабязнасці будовы чалавечага сэрца ў трохмерным вымярэнні на экране, паглядзець на страўнічак знутры, выдзеліць асобныя вены было вельмі цікава і пазнавальна.
Практычнае прымяненне знайшла работа слухачоў падрыхтоўчага аддзялення ФМС з Кітайскай Народнай Рэспублікі Чжу Фаньюй, Яна Юйжу і Яна Чжыці. Распрацаваны імі пад кіраўніцтвам дацэнта Гарбачэўскага Дзмітрыя Анатольевіча слоўнік спецыяльных тэрмінаў па тэме “Кінематыка” будзе выкарыстаны ў вучэбным працэсе для выкладання дысцыпліны “Фізіка” слухачам падрыхтоўчага аддзялення ФМС, якія нядаўна прыбылі з Кітая.
У рамках секцыі “Актуальныя пытанні кітайскай мовы і культуры” ўсе прысутныя з галавой акунуліся ў цуды кітайскай культуры: пачулі аўтарскія апрацоўкі народных кітайскіх песень, абмеркавалі праблемы музеефікацыі нематэрыяльнай культурнай спадчыны Кітая. У яе межах прагучалі 9 дакладаў, сярод выступоўцаў былі студэнты БНТУ, аспірант БДАМ і аспірантка БДУКМ.
Студэнты інжынернага профілю падрыхтавалі даклады аб перадавых распрацоўках кітайскіх кампаній у стварэнні высакахуткасных цягнікоў і супрацоўніцтве МАЗ/МЗКЦ з кітайскімі кампаніямі.
Не абышлося і без супастаўлення рускай і кітайскай моў: студэнт БНТУ расказаў аб культурных асаблівасцях кітайскіх ідыём і супаставіў іх з рускімі і паказаў, што нават нягледзячы на вялікую розніцу паміж двума культурамі, паміж імі ёсць таксама і многа агульнага, што знаходзіць сваё выражэнне ў мове і гаворыць аб тым, што якімі б рознымі ні былі людзі, для іх важныя адны і тыя ж каштоўнасці: сям’я, здароўе і добрае стаўленне адзін да аднаго.
