Рэспубліка Беларусь, 220013, г. Мінск, пр. Незалежнасці 65/2, нав. корп. 2, а. 211а
+375 (17) 255-71-63
power.st@bntu.by
Міністэрствам вышэйшай і сярэдняй адукацыі СССР 12 лютага 1946 года быў выдадзены загад аб адкрыцці ў Беларускім політэхнічным інстытуце (БПІ) энергетычнага факультэта. На факультэце пачалася падрыхтоўка інжынераў-электрыкаў па спецыяльнасці "Электрычныя станцыі, сеткі і сістэмы". З гэтага моманту на працягу ўжо 70-ці гадоў вядзе сваю гісторыю кафедра "Электрычныя станцыі". Тады яна называлася "Электрычныя станцыі, сеткі і сістэмы". Першым загадчыкам кафедры стаў вядомы вучоны, Заслужаны дзеяч навукі і тэхнікі БССР к.т.н., прафесар А.І. Руцкі. Ён жа быў абраны і дэканам энергетычнага факультэта. Аляксандр Іванавіч Руцкі ўзначальваў кафедру на працягу 25 гадоў з 1946 па 1971 год. Гэта кафедра стала родапачынальніцай іншых кафедр электраэнергетычнага напрамку. У 1963 годзе ўтварылася новая кафедра "Электрычныя сістэмы", якая адказвае за падрыхтоўку інжынераў-электрыкаў па спецыяльнасці "Электраэнергетычныя сістэмы і сеткі". У 1970 годзе была створана кафедра "Электразабеспячэнне". З 1963 года кафедра, пра якую ідзе гаворка, стала называцца "Электрычныя станцыі" і рыхтаваць спецыялістаў па такой жа спецыяльнасці. Навучальныя заняткі са студэнтамі праводзяцца ў некалькіх навучальных лабараторыях: "Тэхніка высокіх напружанняў", "Электрамагнітныя пераходныя працэсы", "Электрычная частка электрастанцый", "Мікраэлектронныя прылады, кіраванне, кантроль і абарона электраэнергетычных установак", "Рэлейная абарона і аўтаматыка". Кіруе лабараторыямі Т.А. Іўлева-Шышкова.
У структуры Беларускага нацыянальнага ўніверсітэта кафедра «Электрычныя станцыі» займае адну з найважнейшых пазіцый. Кафедра стала флагманам сярод навучальных цэнтраў па падрыхтоўцы спецыялістаў энергетычнай галіны Беларусі. Яе выпускнікі паспяхова працуюць на розных пасадах электра- і цеплаэнергетычных прадпрыемстваў нашай краіны і за яе межамі. Навуковыя распрацоўкі кафедры вядомы не толькі ў Рэспубліцы Беларусь, але і далёка за яе межамі, а вынікі даследаванняў уяўляюць рэальную практычную цікавасць. Кафедра падтрымлівае цесныя навуковыя і дзелавыя сувязі з прадпрыемствамі і навучальнымі ўстановамі Рэспублікі Беларусь і свету. За гады існавання кафедры для патрэб былога СССР і Рэспублікі Беларусь падрыхтавана звыш 2500 інжынераў-энергетыкаў, якія зараз складаюць аснову кадравага патэнцыялу энергетыкі краіны. Выпускнікі кафедры займалі і займаюць высокія пасады ў электраэнергетыцы: міністра энергетыкі, кіраўнікоў і галоўных інжынераў "Белэнерга", РУП-аблэнерга, электрастанцый, філіялаў "Электрычныя сеткі", "Энерганагляд", прадпрыемстваў будаўніча-мантажнага комплексу Беларускай энергасістэмы, а таксама галоўных энергетык прамысловых прадпрыемстваў.