З 26 па 29 мая 2026 года на пляцоўцы катка стадыёна «Мінск-Арэна» (пр. Пераможцаў, 111А) праходзіць адно з самых папулярных штогадовых выставачных мерапрыемстваў – ХХХI міжнародны ІКT-форум «ТІБА».
ТІБА – найбуйнейшая ІКT-падзея Рэспублікі Беларусь, унікальная пляцоўка для дэманстрацыі інавацыйных рашэнняў і тэхналогій, а таксама месца сустрэч прафесіяналаў лічбавай індустрыі, нетворкінгу і абмену вопытам.
Ва ўрачыстай цырымоніі адкрыцця форуму ўдзельнічалі прадстаўнікі дзяржаўных структур, бізнесу, навуковай супольнасці і галіновых аб'яднанняў Беларусі і Расіі. На адкрыццё форуму былі запрошаны: дырэктар ТАА «Мінскі гарадскі тэхнапарк» Уладзімір Давідовіч, генеральны дырэктар холдынгу «Гарызонт» Юрый Прадзько, старшыня Асацыяцыі вытворцаў і аператараў электразарадных станцый (Расія) Армен Сафарян, генеральны дырэктар Асацыяцыі высокіх тэхналогій і лічбавай інфраструктуры Аляксей Свянціцкі, генеральны дырэктар РУП «Белтамажсервіс» Дзмітрый Кавалёнак, старшыня праўлення Асацыяцыі развіцця электратранспарту «БЭТА» Сяргей Худаешка, старшыня Рэспубліканскага саюза прамыслоўцаў і прадпрымальнікаў і Беларускай навукова-прамысловай асацыяцыі Аляксандр Швец, акадэмік-сакратар аддзялення фізікі, матэматыкі і інфарматыкі Нацыянальнай акадэміі навук Беларусі Аляксандр Шумілін, дырэктар выставачнай кампаніі «Тэхніка і камунікацыі» Рыгор Бондараў.
(фота з сайта арганiзатара)
Свае праекты на выстаўцы дэманструюць больш за 70 кампаній і арганізацый, сярод якіх лідары ІT-рынку Беларусі і Расіі. У 2026 годзе цэнтральнай тэмай форуму стаў штучны інтэлект як драйвер тэхналагічнага развіцця. Насычаная дзелавая праграма ўключае тэматычныя мерапрыемствы: круглыя сталы, семінары, прэзентацыі кампаній-удзельніц. У шырокім коле экспертаў абмяркоўваюцца такія сучасныя трэнды, як заканадаўчае рэгуляванне ў сферы тэлекамунікацый, інтэлектуальная ўласнасць, цэнтры апрацоўкі даных, вялікія даныя, беспілотныя транспартныя сродкі. Разглядаюцца пытанні лічбавай трансфармацыі ключавых галін эканомікі: прамысловасць, сельская гаспадарка, будаўніцтва, транспарт і логістыка, гандаль, адукацыя.
Пастаянным удзельнікам форуму з'яўляецца Міністэрства адукацыі Рэспублікі Беларусь, а Беларускі нацыянальны тэхнічны ўніверсітэт выступае арганізатарам калектыўнай экспазіцыі падведамных Міністэрству адукацыі арганізацый. На стэндзе прадстаўлена каля 30 інавацыйных распрацовак ВНУ, універсітэцкіх тэхнапаркаў і іх рэзідэнтаў: Беларускага дзяржаўнага ўніверсітэта, Беларускага дзяржаўнага ўніверсітэта інфарматыкі і радыёэлектронікі, Беларускага нацыянальнага тэхнічнага ўніверсітэта (у тым ліку дзяржаўнага прадпрыемства «Навукова-тэхналагічны парк БНТУ «Палітэхнік» і яго рэзідэнта ТАА «Тэхналогія і Медыцына 2030»), Беларуска-Расійскага ўніверсітэта, Віцебскага дзяржаўнага ўніверсітэта імя П.М. Машэрава, Гомельскага дзяржаўнага тэхнічнага ўніверсітэта імя П.О. Сухога, Гродзенскага дзяржаўнага ўніверсітэта імя Янкі Купалы, Полацкага дзяржаўнага ўніверсітэта імя Еўфрасінні Полацкай, Рэспубліканскага інстытута прафесійнай адукацыі. Наведвальнікі могуць азнаёміцца з умовамі, створанымі ў краіне для ўкаранення навуковых дасягненняў у галіны эканомікі праз рэалізацыю інавацыйнай палітыкі.
Час работы выстаўкі: 26–28 мая 2026 года – з 10:00 да 18:00; 29 мая 2026 года – з 10:00 да 14:00.
