У канцы лютага ў Пастаўскім раённым доме культуры (Віцебская вобласць) прадоўжыўся маладзёжны праект "Твой выбар", у рамках якога прайшла традыцыйная сустрэча першакурснікаў, учорашніх выпускнікоў школ горада "Студэнт.by". На мерапрыемстве прысутнічалі дзевяць студэнтаў сталічных ВНУ. Яны вельмі цікавыя, мэтанакіраваныя, граматныя маладыя людзі, якія атрымалі высокія балы на цэнтралізаваным тэсціраванні і, як вынік, выбралі прэстыжныя прафесіі.
Першакурснікі выступілі перад абітурыентамі-2026. Так, Міхаіл Трава, студэнт прыборабудаўнічага факультэта, які навучаецца па спецыяльнасці «мікра- і нанасістэмная тэхніка», распавёў пра сваю гісторыю паступлення ў Беларускі нацыянальны тэхнічны ўніверсітэт, пра вучобу і першую сесію, пра жыццё ў інтэрнаце, розныя мерапрыемствы, якія праводзяцца ў Палітэху («Дзень першакурсніка», спартакіяда, сустрэчы з цікавымі людзьмі і т. д.).
Пытанні старшакласнікаў былі канкрэтнымі: наколькі складаная навучальная праграма, якія дысцыпліны вывучаюцца на першым курсе, як адаптавацца да жыцця ў інтэрнаце. Шчырыя і разгорнутыя адказы Міхаіла Травы, заснаваныя на асабістым вопыце, дапамаглі будучым абітурыентам зірнуць на прафесію інжынер як на высокатэхналагічную, творчую сферу дзейнасці, а таленавітай моладзі зрабіць усвядомлены выбар на карысць тэхнічнай адукацыі.
Іншыя ўдзельнікі праекта «Твой выбар» – студэнты Беларускага дзяржаўнага ўніверсітэта, Беларускага дзяржаўнага ўніверсітэта інфарматыкі і радыёэлектронікі, Беларускага дзяржаўнага эканамічнага ўніверсітэта, Беларускага дзяржаўнага педагагічнага ўніверсітэта ім. Максіма Танка, Беларускага нацыянальнага тэхнічнага ўніверсітэта (энергетычны факультэт) – таксама падзяліліся са школьнікамі сваімі гісторыямі паступлення ў ВНУ і расказалі пра выбраныя спецыяльнасці.
