Беларускі нацыянальны тэхнічны ўніверсітэт з гонарам адзначае сваіх выпускнікоў, якія ўносяць значны ўклад у развіццё Рэспублікі Беларусь. Сярод такіх выбітных спецыялістаў — Юрый Станіслававіч Масюк, генеральны дырэктар ААТ «Кіруючая кампанія холдынга “Белаўтадар”», якому прысвоена ганаровае званне «Ганаровы выпускнік БНТУ».
Юрый Станіслававіч скончыў факультэт транспартных камунікацый Беларускага палітэхнічнага інстытута (цяпер БНТУ) у 1988 годзе па спецыяльнасці «Аўтамабільныя дарогі». Атрыманая ў alma mater інжынерная падрыхтоўка стала трывалым фундаментам яго далейшай плённай працы ў дарожнай галіне.
Пасля заканчэння ВНУ Юрый Станіслававіч пачаў працу галоўным інжынерам ДЭУ №160 аб’яднання «Гроднааблдарбуд». Пазней узначальваў ДРБУ №158, а ў 1998 годзе быў прызначаны тэхнічным дырэктарам РУП «Магістральаўтадар».
У 2003 годзе ён стаў генеральным дырэктарам прадпрыемства, а пасля рэарганізацыі дарожнай галіны ў 2005 годзе ўзначаліў РУП «Мінскаўтадар-Цэнтр».
У 2010–2013 гг. займаў кіраўнічыя пасады ў Дэпартаменце «Белаўтадар», а з 2013 года ўзначальвае прадпрыемства «Кіруючая кампанія холдынга “Белаўтадар”», якое ў 2016 годзе было ператворана ў адкрытае акцыянернае таварыства.
Пад кіраўніцтвам Юрыя Станіслававіча паспяхова рэалізаваны ключавыя праекты дарожнай інфраструктуры Рэспублікі Беларусь, у тым ліку:
рэканструкцыя аўтамабільных дарог М-5 Мінск – Гомель, М-6 Мінск – Гродна – мяжа Польшчы, Р-23 Мінск – Мікашэвічы (у тым ліку ў цэментабетонным выкананні);
будаўніцтва Другой кальцавой аўтамабільнай дарогі вакол Мінска;
стварэнне Паўднёва-заходняга аб’язнога шляху г. Магілёва;
рэканструкцыя ўчасткаў М-3 Мінск – Віцебск, аб’язнога Плешчаніц, аўтамабільных дарог Р-80, Р-53, Р-15, Р-16 і іншых.
У сціслыя тэрміны пабудавана Другая ўзлётна-пасадачная паласа Нацыянальнага аэрапорта “Мінск” і праведзены капітальны рамонт ВПП на аэрадроме “Орша”.
Асобнай вяхой стала будаўніцтва 12 моставых збудаванняў у рамках праекта «Рэспубліканскія масты і рэканструкцыя аўтадарогі М-3», а таксама датэрміновы ўвод моста праз раку Прыпяць на аўтадарозе Р-131 Калінкавічы – Мазыр.
За значны ўклад у развіццё дарожнай галіны Юрый Станіслававіч узнагароджаны ведамаснымі ўзнагародамі. У 2004 годзе яму была аб’яўлена Падзяка Прэзідэнта Рэспублікі Беларусь, а ў 2024 годзе ён удастоены дзяржаўнай узнагароды — медаля «За працоўныя заслугі».
Прысваенне Юрыю Станіслававічу Масюку звання «Ганаровы выпускнік БНТУ» — гэта прызнанне яго высокага прафесіяналізму, кіраўніцкага таленту і шматгадовага ўкладу ў развіццё інфраструктуры краіны.
Факультэт транспартных камунікацый і ўвесь БНТУ з гонарам адзначаюць свайго выпускніка, які з'яўляецца годным прыкладам для новых пакаленняў інжынераў.
Факультэт транспартных камунікацый БНТУ шчыра віншуе Юрыя Станіслававіча Масюка з прысваеннем звання «Ганаровы выпускнік БНТУ».
Калектыў факультэта выказвае глыбокую павагу і ўдзячнасць за шматгадовую працу, высокі прафесіяналізм і значны асабісты ўклад у развіццё дарожнай галіны Рэспублікі Беларусь.
Мы ганарымся, што сярод нашых выпускнікоў — такія выбітныя кіраўнікі і спецыялісты, чыя дзейнасць мае агульнанацыянальнае значэнне.
Жадаем Юрыю Станіслававічу моцнага здароўя, новых поспехаў, далейшых прафесійных перамог і ўвасаблення ўсіх планаў! Няхай яго вопыт, лідарства і адданасць справе натхняюць будучыя пакаленні інжынераў.
