9 кастрычніка замежныя студэнты Беларускага нацыянальнага тэхнічнага ўніверсітэта — студэнты 1 курса факультэта транспартных камунікацый (ФТК), 2 курса факультэта энергетычнага будаўніцтва (ФЭБ) і 4 курса факультэта тэхналогій кіравання і гуманітарызацыі (ФТКГ) — разам з выкладчыкамі А. А. Азявай, І. С. Балабановіч, В. А. Дылянок і Д. Д. Міцюляй наведалі XXIX Міжнародную спецыялізаваную выставу «Энергетыка. Экалогія. Энергазберажэнне. Электра», што праходзіла ў межах XXIX Беларускага энергетычнага і экалагічнага форума.
Мерапрыемства адбылося ў горадзе Мінску, Футбольны манеж (праспект Пераможцаў, 20/2), і аб’яднала вядучыя айчынныя і замежныя кампаніі, якія працуюць у сферы энергетыкі, экалогіі і інавацыйных тэхналогій.
Падчас выставы студэнты пазнаёміліся з сучаснымі рашэннямі ў галіне будаўніцтва і абслугоўвання электрастанцый, сістэм электразабеспячэння, аднаўляльных і альтэрнатыўных крыніц энергіі. Асаблівую ўвагу выклікалі найноўшыя мадэлі электрамабіляў — ад легкавых аўтамабіляў да электрагрузавікоў і гарадскога транспарту.
Акрамя таго, будучыя спецыялісты пашырылі свае веды пра работу Беларускай атамнай электрастанцыі і іншыя нацыянальныя энергетычныя праекты.
Наведванне выставы стала важным этапам у прафесійным станаўленні замежных студэнтаў. Многія адзначылі, што атрыманыя веды і ўражанні дапамогуць ім вызначыцца з напрамкам далейшага развіцця і будучага працаўладкавання па спецыяльнасці.
