Сфера навуковай дзейнасці кафедры ахоплівае шырокае кола праблем па ўдасканаленні існуючых і распрацоўцы новых гідрапнеўмасістэм, іх агрэгатаў і абсталявання, якія прымяняюцца ва ўсіх галінах народнай гаспадаркі, а менавіта разліках, распрацоўцы, стварэнню і дыягнаставанню розных сочачых электрапнеўматычных прывадаў, антыблакіровачных тармазных сістэм транспартных сродкаў, аб'яднаных сістэм прывада тармазоў, рулявога кіравання і перакульвальнага механізму кар'ерных аўтамабіляў вялікай грузападымальнасці і шматлікіх іншых гідра- і пнеўмасістэм мабільных і тэхналагічных машын.
Кафедра ўдзельнічала ў правядзенні розных даследаванняў па дзяржбюджэтнай і гаспадарчай дагаворнай тэматыках, у тым ліку па найважнейшых Дзяржпраграмах: "Рэсурсазберажэнне", "Белаўтатрактарабудаванне", "Механіка", "Кар'ерная тэхніка" і інш.
Прафесарска-выкладчыцкім складам кафедры апублікавана больш за 1500 навуковых прац, атрымана больш за 450 аўтарскіх пасведчанняў і патэнтаў, многія з якіх укаранёны на прамысловых прадпрыемствах Рэспублікі Беларусь.
Уносячы ўклад у развіццё беларускай навуковай школы машынабудаўнікоў, кафедра вядзе навучанне аспірантаў па спецыяльнасцях "Машыназнаўства, сістэмы прывадаў і дэталі машын" і "Коласныя і гусенічныя машыны", а таксама магістрантаў па спецыяльнасці "Машынабудаванне і машыназнаўства". За гады існавання кафедры на ёй падрыхтаваны доктар тэхнічных навук М. Халамонскі - кіраўнік аддзела ацяплення і вентыляцыі тэхналагічнага ўніверсітэта ў г. Быдгашч (Польшча) і каля 30 кандыдатаў тэхнічных навук, сярод якіх: Забалоцкі М. М. - намеснік генеральнага канструктара Беларускага аўтамабільнага завода; Глазкоў Л. А. - загадчык НДІЛ Гідрапнеўмасістэм і нафтапрадуктаў БНТУ; Жылевіч М. І., Кішкевіч П. М. і Флерка І. М. – намеснікі дэкана аўтатрактарнага факультэта БНТУ, Смірноў А. М.
У навукова-даследчай рабоце кафедры актыўны ўдзел прымаюць і студэнты. Штогод да 15 - 25 чалавек выступаюць з дакладамі на рэспубліканскіх і міжнародных канферэнцыях. Па лепшых пошуках падаюцца заяўкі на вынаходніцтвы, публікуюцца навуковыя артыкулы, афармляюцца працы, для ўдзелу ў конкурсах, ёсць магчымасць атрымання грантаў.
Так у 2014 годзе пяць студэнтаў кафедры: Вашчанак Ю.В., Лаптонавіч Д.С., Мішэнскі М.А., Пуцят В.А., Нікалаенка Н.С. узнагароджаны прэміямі спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў.
Творча здольныя выпускнікі, якія праявілі актыўнасць у вучобе і навуковай рабоце, маюць магчымасць працягваць навучанне ў магістратуры і аспірантуры.
Усе напрамкі дзейнасці кафедры і НДЛ непасрэдна звязаны з вытворчасцю. Заказчыкамі многіх выкананых кафедрай навукова-даследчых работ з'яўляюцца вядучыя прадпрыемствы Рэспублікі Беларусь: БелАЗ, МАЗ, МТЗ, "Белкамунмаш", "Амкадор", МЗКЦ і інш. На іх базе праводзяцца тэхналагічная, канструктарская, пераддыпломная практыкі студэнтаў.
На кафедры ажыццяўляецца навукова-тэхнічнае супрацоўніцтва з замежнымі партнёрамі, вядзецца мэтавая падрыхтоўка замежных спецыялістаў па сучасных інжынерна-тэхнічных напрамках у галіне гідра- і пнеўмасістэм мабільных і тэхналагічных машын. Пад кіраўніцтвам супрацоўнікаў кафедры абаронены доктарская і кандыдацкія дысертацыі замежнымі спецыялістамі з Польшчы, В'етнама, Іарданіі і Лівана, а таксама магістарскія дысертацыі грамадзянамі Лівіі.
