З 22 ліпеня па 2 жніўня 2025 года на тэрыторыі г. Нясвіжа праходзіць валанцёрскі праект «Замкі Беларусі», арганізатарам якога з'яўляецца Рэспубліканскае грамадскае аб'яднанне «Беларуская асацыяцыя клубаў ЮНЭСКА». Асноўная праца валанцёраў складаецца ва ўборцы смецця і галінак, пяску, акультурванні тэрыторыі гісторыка-культурных і прыродных аб'ектаў у Нясвіжы і на тэрыторыі самога замка.
Студэнтка ФМС Рахмедава Анэтта таксама прымае ўдзел у гэтым праекце. Яна распавяла, што для ўдзельнікаў арганізоўваюць розныя экскурсіі і культурныя мерапрыемствы: творчыя вечары, настольныя гульні, квэсты, трэнінгі. Для Анэтты ўдзел у такім маштабным валанцёрскім праекце стаў не толькі магчымасцю ўнесці свой уклад у захаванне культурнай спадчыны, але і ўнікальным вопытам асобаснага росту. Дзяўчына атрымала каштоўныя навыкі, знайшла новых сяброў, пашырыла свой кругагляд, больш даведалася пра гісторыю Беларусі, па-сапраўднаму адчула сувязь з мінулым.
Гэта яскравы прыклад таго, як любоў да гісторыі і неабыякавасць да культурнай спадчыны можа аб'яднаць людзей розных нацыянальнасцяў і ўзростаў для дасягнення высакароднай мэты. Хочацца выказаць падзяку арганізатарам праекта за магчымасць удзелу замежных студэнтаў у такім маштабным праекце.
