Дэкан Архітэктурнага факультэта Беларускага нацыянальнага тэхнічнага ўніверсітэта.
Доктар архітэктуры, прафесар.
Нарадзіўся 3 чэрвеня 1948 г. у г. Адэса.
Бацькі: бацька - з Карабаха, маці - беларуска.
У 1965 годзе скончыў школу ў г. Мінску з залатым медалём. Скончыў Беларускі політэхнічны інстытут па спецыяльнасці "Архітэктура" ў 1970г. У 1974 г., абараніў кандыдацкую дысертацыю па тэме "Архітэктура дарог", упершыню ў СССР. З 1974 па 2005 гг. працаваў у дарожных арганізацыях рэспублікі. З 2005 года - па цяперашні час дэкан архітэктурнага факультэта БНТУ.
Працуючы ў дарожнай галіне Беларусі, у якасці галоўнага архітэктара, распрацаваў асабіста і як кіраўнік творчага калектыву больш за 250 праектаў добраўпарадкавання аўтамабільных дарог, маставых збудаванняў, дарожнага сервісу і дызайну. Творчую дзейнасць як архітэктар працягвае сёння ў БНТУ, працуючы, галоўным чынам, у жанры мемарыяльнай архітэктуры.
Аўтар архітэктурных праектаў: "Пачатак дарог Беларусі" на Кастрычніцкай плошчы ў г. Мінску (1998 г), бульвар па вул. Леніна ў г. Мінску (2002-2003 гг), памятны знак "Пакроў Божай маці" ў г. Маладзечна (2011 г), помнік "Полацк - калыска беларуская" замежжа» ў г. Мінску (2018 г), помнік Антонію Тызенгаўзу ў г. Паставы (2019 г), памятны знак «Крышталь ведаў» у г. Мінску (2020 г) і інш.
За апошнія тры гады надрукаваў 25 навуковых прац. Усяго апублікавана больш за 200 работ, з іх 20 кніг. З'яўляецца галоўным рэдактарам і старшынёй рэдкалегіі двух навуковых выданняў, прызнаных ВАК Рэспублікі Беларусь.
Кнігі апошніх гадоў: «Прыгажосць. Эстэтыка беларускай архітэктуры» (2015), «Люстэрка прыгажосці. Эстэтыка персідскай архітэктуры» (2017), «Здабыццё раю. Сады і паркі ў беларускай і сусветнай архітэктуры» (2020), «Храм. Традыцыі сусветнай і беларускай архітэктуры» (2020) і інш. Працы Сардарава А. С. друкаваліся ў Кітаі (1989 г), ЗША (1992 г), Польшчы (2005, 2007, 2011 гг), Расіі (2010 г, 2019 г.).
Узнагароджаны дзяржаўнымі ўзнагародамі: ордэнам "Пашаны" (2020 г) і медалём Францыска Скарыны (2011 г); медалём Беларускай праваслаўнай Царквы Свяціцеля Кірылы Тураўскага (2008 г); шасцю сярэбранымі медалямі ВДНГ СССР (1981, 1982, 1986, 1988, 1990, 1991 гг); знакамі «Ганаровы дарожнік» I і II ступеняў (2002, 2005 гг); залатым медалём «За заслугі ў сферы навукі» Ерэванскага дзяржаўнага ўніверсітэта архітэктуры і будаўніцтва (2011 г); нагрудным знакам Полацкага дзяржаўнага ўніверсітэта (2013 г). Званне «Мінчук года» (2012 г). Ганаровымі граматамі і граматамі Мінскага абласнога і гарадскога саветаў, Міністэрства адукацыі, Міністэрства архітэктуры і будаўніцтва, БНТУ і інш. Лаўрэат і дыпламант міжнародных і рэспубліканскіх конкурсаў архітэктурных праектаў, навуковых публікацый, фотаработ.
Архітэктура
КНІГІ
